जळगाव शहरातील सफाई
संदर्भात मनपा आयुक्त जीवन सोनवणे यांना सोशल मीडियातून जाहीरपणे ८ प्रश्न विचारले
होते. आयुक्तांनी त्यांची दखल घेवून त्या प्रश्नांची अत्यंत सविस्तर लेखी उत्तरे
दिली आहेत. पहिल्यांदा असे घडले की, सोशल मीडियात प्रश्न विचारले आणि वरिष्ठ अधिकाऱ्याने
दखल घेतली. याबद्दल आयुक्त व आरोग्याधिकारी यांचे प्रथमतः अभिनंदन. प्रश्नांच्या
उत्तरातून सफाई विभागावर होणारा वार्षिक खर्च समोर आला आहे. दरवर्षी शहरातील
सफाईवर ठेकेदारी स्वरुपत जवळपास ६ कोटी ६५ लाख रुपये ५ लाख लोकसंख्येवर खर्च होतात.
यात सफाई विभागातील कायम कर्मचारी व अधिकारी यांचे वेतन नाही. ती रक्कम सफाई
खर्चात एकत्र केली तर सफाई विभागावर होणारा वार्षिक खर्च हा १३ कोटी ८९ लाख ३१
हजार होतो. म्हणजेच, वर्षभरात एका नागरिकावर सफाईचा खर्च २७७ रुपये ८६ पैसे होतो.
प्रश्न हाच आहे की, या खर्चाच्या तुलनेत नागरिकांना शहर स्वच्छ होत असल्याचे समाधान
मिळते आहे का ?
